Techničny defołt nie adbyŭsia, dziakujučy ZŠA i miljardam ekspartnaj vyručki za haz i naftu
Na dumku ekanamičnaha dyrektara BEROC Kaciaryny Barnukovaj, techničny defołt u RF nie adbyŭsia ŭ pieršuju čarhu pa pryčynie taho, što ZŠA vyrašyli da jaho nie davodzić.
«Jany dazvolili pravieści apošniuju vypłatu ŭ dalarach z zabłakavanych rachunkaŭ, nie spyniŭšy dziejańnie licenzii, jakaja dazvalaje vykarystoŭvać zabłakavanyja reziervy dla vypłat dziaržaŭnaj zapazyčanaści. U hetym i zaklučajecca asnoŭnaja pryčyna», — ličyć Barnukova.
U toj ža čas ekanamistka źviartaje ŭvahu na inšy važny faktar, jaki dapamahaje Rasii paźbiahać defołtu.
«Tam dahetul zastajucca niepadsankcyjnymi asnoŭnyja ekspartnyja pazicyi ŭ vyhladzie nafty i hazu.
RF praciahvaje atrymlivać miljardy ekspartnaj vyručki, tamu pra niejki defołt, jaki nie byŭ by techničnym (jak u vypadku z błakavańniem rachunkaŭ), kazać pakul što dakładna nie davodzicca.
Tym nie mienš heta zusim nie aznačaje, što z ekanomikaj RF usio budzie dobra. Vialiki ŭpłyŭ na jaje akazvajuć sankcyi i sychod zamiežnych kampanij.
Efiekt sankcyj najbolš jarka zaŭvažny ŭ aŭtamabilnaj pramysłovaści, jakaja pa vynikach krasavika ŭpała amal na 80%.
U sučasnym śviecie lubaja surjoznaja pramysłovaść zaviazanaja na impartnych kamplektujučych, jakija nie zaŭsiody mahčyma čymści zamianić. Akramia taho, razam z zamiežnymi kampanijami sychodziać i technałohii, i tady ŭźnikaje nastupnaja prablema, kali my nie možam ničoha sami vyrabić, navat kali b u nas byli dla hetaha ŭsie nieabchodnyja detali», — adznačaje ekśpiertka.
«Chutka i dobra zamiaščać impartnyja tavary i technałohii atrymlivajecca tolki pa televizary»
Dakładna acanić efiekt ad mnohich sankcyj vielmi składana.
«Treba razumieć, što ŭ vysokatechnałahičnaj vytvorčaści moža być situacyja, kali tavar, jaki pierastali pastaŭlać praz sankcyi, moža składać usiaho niekalki pracentaŭ ad koštu praduktu. Ale heta nie značyć, što halina stracić tolki hetyja paru pracentaŭ. Bo moža zdarycca tak, što z-za hetaha elemienta spynicca praktyčna ŭsia vytvorčaść, jak my bačym pa aŭtamabilebudavańni, — kaža Kaciaryna. —
Kamplektujučyja da aŭtamabilaŭ — heta nie sałomka dla soku abo ŭpakoŭka dla małaka. Pakolki sok, jak my bačym, mohuć pradavać biez trubački, a małako raźlivać u taru ad johurta abo ŭ taru bieź jakich-niebudź apaznavalnych znakaŭ. Praź niejki čas možna naładzić vytvorčaść takich rečaŭ albo znajści im zamienu. Z vysokatechnałahičnaj vytvorčaściu tak nie atrymajecca. Tamu ŭsie hetyja nastupstvy strašnyja dla ekanomiki, bo chutka i dobra zamiaščać impartnyja tavary i technałohii atrymlivajecca tolki pa televizary».
Samy ciažki pieryjad jašče napieradzie
Kažučy pra efiekt sankcyj, Kaciaryna Barnukova źviartaje ŭvahu na toje, što bolšaść ź ich nie pačynajuć akazvać upłyŭ imhnienna. Pa hetaj pryčynie atrymlivajecca, što niejki čas ekanomika moža pracavać pa iniercyi, a vytvorčaść trymajecca na najaŭnych składskich zapasach.
«Heta paćviardžajuć i słovy aficyjnych asob. Taja ž Elvira Nabiulina (kiraŭnica Centrabanka RF) kazała, što pakul usio bolš-mienš dobra, ale bližej da vieraśnia Rasiju nakryje pa poŭnaj prahramie i pačniecca toje, što jana nazvała «strukturnaj transfarmacyjaj». Padobnyja zajavy paćviardžajuć toj fakt, što samy ciažki pieryjad jašče napieradzie. Rasija trymajecca na niejkich zapasach, tamu pravał pa VUP pačaŭsia tolki ŭ krasaviku, a nie ŭ sakaviku, ale dalej budzie tolki horš», — prahnazuje ekanamistka.
U toj ža čas u Biełarusi ŭsie hetyja pracesy raźvivajucca bolš imkliva, čym u RF, pakolki asnoŭnyja pazicyi biełaruskaha ekspartu, u adroźnieńnie ad rasijskaha, trapili pad sankcyi, jakija pavolna, ale ŭžo pačynajuć dziejničać. Jak vynik,
Biełaruś atrymała minus 6% VUP u krasaviku.
«Ludzi pryvykli asacyjavać kurs valuty sa stabilnaściu»
Nie varta ŭvodzić siabie ŭ zman tym, što kali kurs nacyjanalnaj valuty stabilizavaŭsia, to ŭ ekanomicy krainy ŭsio dobra. Stabilnaść kursu Barnukova tłumačyć u pieršuju čarhu tym, što ŭ Rasii mocna ŭpaŭ impart, a ekspart — nie.
«Kurs farmujecca patokami valuty ŭ krainu i z krainy. Asnoŭnyja patoki — heta handlovyja. Ekspart RF amal nie ŭpaŭ, a impart skaraciŭsia na 80—90%. I dla ekanomiki heta prosta katastrofa. Častka impartu — heta nie prosta spažyvieckija tavary, ale i pramiežkavyja tavary, jakija potym vykarystoŭvajuć u vytvorčaści. I kali ich pierastajuć uvozić, to vytvorčaści rana ci pozna spyniacca. Ale ŭ takoj situacyi rubiel budzie ŭmacoŭvacca, bo niama impartu, na jaki tracicca valuta.
Dziakujučy hetamu, stvarajecca łžyvaje ŭražańnie dabrabytu, pakolki ludzi pryvykli asacyjavać kurs valuty sa stabilnaściu ekanomiki».
Havoračy pra kurs biełaruskaha rubla, Kaciaryna adznačaje, što jon pajšoŭ pryčepam z rasijskim, bo ŭ Biełarusi situacyja ź impartam i ekspartam surjozna adroźnivacca ad rasijskaj.
«U nas niama takoha surjoznaha padzieńnia impartu, ale jość padzieńnie ekspartu, jakoje jašče pahoršycca paśla taho, jak pačnie dziejničać šosty pakiet sankcyj. U vyniku ekspart skarocicca jašče bolš surjozna, paśla čaho biełaruski rubiel budzie vymušany adviazacca ad rasijskaha, prynamsi, kali ŭ nas taksama nie pojdzie skaračeńnie impartu. Ale pakul my bačym, što ŭ nas u asnoŭnym padaje impart z Rasii — źviazana heta z tym, što nam prosta nie treba stolki nafty dla pierapracoŭki, bo niama rynkaŭ zbytu.
Hledziačy na biahučy raskład spraŭ, možna kazać pra toje, što ŭsie niehatyŭnyja nastupstvy Biełaruś pačnie adčuvać na sabie niedzie ź siaredziny leta, a Rasija — z vosieni. U vypadku, kali ŭ dačynieńni da RF buduć pryniatyja pastanovy ab embarha nafty, to heta ŭsio roŭna praces pastupovy, i pik nastupstvaŭ budzie dasiahnuty dzieści naprykancy hoda».
Strata Ukrainy — vielmi balučaja dla našaj ekanomiki
Akcentujučy ŭvahu na adroźnieńniach situacyi ŭ Biełarusi i Rasii, ekśpiertka adznačaje, što na ekanomiku našaj krainy ŭpłyvajuć adrazu try faktary. Aproč sankcyj, heta strata ŭkrainskaha rynku, jaki składaŭ 14% biełaruskaha ekspartu ŭ 2021 hodzie, a taksama zvužeńnie rasijskaha rynku, jaki sam mocna cierpić ad sankcyj.
«Možna kazać pra toje, što pa vyniku biełaruskaja ekanomika moža stracić navat bolš, čym rasijskaja, pakolki naša kraina była ciesna źviazanaja z Ukrainaj, jakaja była našym ekanamičnym partnioram numar dva. U vyniku my atrymlivajem, što naš druhi pa abjomie partnior całkam stračany, a pieršy źbiadnieŭ. Heta tyja niehatyŭnyja faktary, ź jakimi nie sutykniecca Rasija, pakolki Ukraina nie była dla jaje takim značnym rynkam».
Adzinaj nadziejaj dla našaj ekanomiki Kaciaryna nazyvaje hłabalnyja źmieny pa pytańniach sankcyj. Ale pakul taki scenaryj ujaŭlajecca małaimaviernym — praz pazicyju Ukrainy i Zachadu.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Tajvań zabaraniŭ pastaŭki vysokatechnałahičnaj pradukcyi ŭ Rasiju i Biełaruś
Zahružanaść «Naftana» składaje 64%, jość prablemy z łahistykaj
Ukrainski dyler MAZ mianiaje biełaruskija šasi na zachodnija
