Apošni raz ahienctva pierahledzieła rejtynh mienš za tydzień tamu, 3 sakavika. Adnak ciapier arhanizacyja musiła jašče pahoršyć prahnozy z ulikam uviadzieńnia novych sankcyj i ŭkaza Uładzimira Pucina, jaki dazvoliŭ vypłačvać valutnyja pazyki «niedružalubnym» krainam u rublach.
6 sakavika inšaje rejtynhavaje ahienctva, Moody's, paniziła suvierenny rejtynh Rasii da «pieraddefołtnaha».
Što ŭsio heta značyć, tłumačyć u admysłovym materyjale Bi-bi-si.
Defołt — heta niemahčymaść abo admova krainy vypłačvać svaje daŭhi. Rasija ŭžo pieražyła defołt u 1998 hodzie.
Na praciahu niekalkich hadoŭ da hetaha kraina aktyŭna vypuskała dziaržaŭnyja karotkaterminovyja ablihacyi (DKA). Urad nie zmoh absłuhoŭvać hety doŭh i ŭ adnabakovym paradku abjaviŭ restrukturyzacyju hetych papier.
Hety kryzis zapomniŭsia mnohim. U žniŭni 1998 hoda adbyłasia rezkaja devalvacyja rubla, na finansavych rynkach zdaryłasia panika, ceny ŭźlacieli, a zatym zbankrutavała niekalki bankaŭ. Rabotniki kramaŭ uspaminajuć, što prykładna raz u niekalki hadzin mianiali ceńniki, bo z-za padzieńnia rubla ceny davodziłasia pastajanna pierahladać. Ludzi ŭ panicy skuplali ŭsie tavary, jakija traplalisia pad ruku.
Hetym razam situacyja krychu inšaja. Fitch piša, što defołt ciapier niepaźbiežny, bo, na dumku ahienctva, dziaržava ŭsio mienš hatovaja absłuhoŭvać svaje abaviazki. U ahienctvie spasyłajucca na ŭkaz prezidenta i zajavy centralnaha banka, jakija abmiažoŭvajuć roznyja vypłaty pa daŭhavych papierach dla zamiežnikaŭ.
U ahienctvie čakajuć, što Rasija moža navažycca na «palityčny adkaz» na sankcyi ŭ halinie enierhietyki, pra jakija zajavili ŭ hety aŭtorak ZŠA i krainy ES, i admovicca ad vypłaty častki svaich abaviazalnictvaŭ.
U rejtynhavaha ahienctva Moody's, jakoje 6 sakavika taksama papiaredžvała ab ryzycy defołtu Rasii i źniziła jaje rejtynh da Sa, taksama pieraddefołtnaha, tłumačeńni takija ž, jak u Fitch: u krainie abmiažoŭvajecca ruch kapitału i roznyja vypłaty inšaziemcam. U ahienctvie sumniavajucca ŭ tym, što Rasija «choča i zdolnaja» płacić pa svaich abaviazalnictvach.
Asnoŭnaja roźnica pamiž 1998 hodam i ciapierašniaj situacyjaj — u pryčynach kryzisu. Defołt 1998-ha mnohija ekanamisty nazyvajuć «traŭmaj» ciapierašniaha ŭrada. Tady ekanomika była niestabilnaja, a ŭrad sapraŭdy zanadta aktyŭna pazyčaŭ hrošy i nie moh spravicca z kryzisami, jakija pastajanna ŭźnikali.
Paśla hetaha vopytu ekanamičny błok urada na mnohija hady vybraŭ žorstkuju finansavuju palityku, adkładvajučy značnuju častku dachodaŭ u reziervy i nie dazvalajučy istotna naroščvać dziarždoŭh. Urad za hetuju palityku vielmi krytykavali, bo ličyłasia, što jana nie daje ekanomicy dastatkova hrošaj na raźvićcio.
U vyniku ŭ Rasii sabralisia dastatkova vialikija reziervy. Na 1 lutaha ŭ Fondzie nacyjanalnaha dabrabytu było amal 175 młrd dalaraŭ. Rejtynhavyja ahienctvy i analityki adznačali, što hetyja reziervy źjaŭlajucca «paduškaj» biaśpieki Rasii i zabiaśpiečać stabilnaść ekanomiki.
U 1990-ja hady pra jakuju-niebudź «padušku» biaśpieki i stabilnaść ekanomiki havorki nie išło. Adnak u ciapierašnich umovach akazałasia, što i hetyja nazapašvańni nie harantujuć finansavaj stabilnaści.
Ci moža defołt Rasii surjozna źmianić situacyju ciapier — heta sprečnaje pytańnie. Rubiel i tak dastatkova mocna ŭpaŭ. Kurs sprabujuć padtrymlivać z dapamohaj valutnych interviencyj — spačatku Centralnaha banka, a zatym, paśla taho jak jaho aktyvy byli zamarožanyja, z dapamohaj prodažu valuty z boku eksparcioraŭ.
Zamiežnyja inviestary z-za vajny z Ukrainaj i sankcyj u asnoŭnym pakinuli rasijski rynak. Davier da rasijskaj ekanomiki i ŭładaŭ u mižnarodnych inviestaraŭ padarvany.
