Fota: Themba Hadebe / AP
U paŭdniovaafrykanskaj pravincyi Limpapo adbyłasia aŭtakatastrofa, u vyniku jakoj zahinuli 45 čałaviek: z mosta zvaliŭsia aŭtobus z pałomnikami, jakija nakiroŭvalisia z Batsvany na vielikodnuju słužbu ŭ horad Moryja, piša Bi-bi-si.
Jak miarkujecca, kiroŭca straciŭ kiravańnie, i aŭtobus urezaŭsia ŭ aharodžu, prałamaŭ jaje i ŭpaŭ u ciaśninu z vyšyni blizu 50 mietraŭ.
Heta adbyłosia na hornym pieravale prykładna za 300 km na poŭnač ad Jochaniesburha.
Vyžyła tolki vaśmihadovaja dziaŭčynka. Jana atrymała surjoznyja traŭmy, ale znachodzicca ŭ stabilnym stanie.
«My miarkujem, što ŭ momant, kali aŭtobus sutyknuŭsia z barjeram na moście, dziaŭčynku vykinuła z aŭtobusa, i tamu jana zmahła vyžyć», — skazaŭ Bi-bi-si aficyjny pradstaŭnik paŭdniovaafrykanskaha Ministerstva transpartu Solin Msibi.
Paśla katastrofy pačałasia vyratavalnaja apieracyja, jakaja praciahvałasia da ranicy piatnicy. Ź ciaśniny dastali cieły zahinułych, adnak tolki dzieviać ź ich udałosia identyfikavać. Pakolki ŭ vyniku sutyknieńnia aŭtobus zahareŭsia, pareštki mnohich achviar katastrofy byli paškodžanyja.
Ministr transpartu Sindysive Čykunha raspavioŭ, što daroha, ź jakoj upaŭ aŭtobus, adroźnivajecca mnostvam «stromkich pavarotaŭ, vielmi vostrych vuhłoŭ».
«Ja b nikoli nie raiŭ vykarystoŭvać hetuju darohu kiroŭcam vialikich transpartnych srodkaŭ, takich jak aŭtobusy ci hruzavyja mašyny», — kaža ministr.
Čytajcie taksama:
U polskim Ščecinie mašyna ŭlacieła ŭ ludski natoŭp, dziasiatki paciarpiełych
U Indaniezii ŭ futbalista ŭdaryła małanka prosta padčas matču VIDEA