Fota: Wikimedia Commons
Pretenzii da pary ŭźnikli, bo ŭ ich mašynie znajšli rečyvy bramaziepam i kłanaziepam — mocnyja supakajalnyja. Jany ŭvachodziać u śpisy narkatyčnych srodkaŭ i psichatropnych rečyvaŭ, za niezakonny abarot jakich možna trapić pad kryminalnuju adkaznaść.
Pavieł tłumačyć, što pa zakonie «Ab zvarocie lekavych srodkaŭ» zabaroniena ŭvozić u Biełaruś praterminavanyja, falsifikavanyja i niajakasnyja leki — vierahodna, kali ŭźnikajuć sumnieńni ŭ tym, ci preparat jakasny, heta musić vyrašać ekśpiertyza.
Leki, da jakich treba być uvažlivymi pry pierasiačeńni miažy, raźmierkavanyja ŭ niekalki śpisaŭ. U pieršym ź ich jość preparaty, jakija vykarystoŭvajucca ŭ šerahu krain, ale zabaronienyja ŭ Biełarusi. Naprykład, heta lekavaja marychuana, jakaja moža ŭtrymlivać u svaim składzie tetrahidrakanabinoł. A taksama niekatoryja leki, jakija pryznačajucca ludziam ź sindromam deficytu ŭvahi i hipieraktyŭnaści (SDUH) — deksamfietamin (aderoł) i jaho sulfat (deksiedryn). Hetyja preparaty ni ŭ jakim razie nielha ŭvozić u Biełaruś, navat kali ŭ inšaj krainie vam ich pryznačyŭ lekar.
Dalej iduć druhi i treci śpisy — adpaviedna asabliva niebiaśpiečnyja i niebiaśpiečnyja narkatyčnyja i psichatropnyja rečyvy, dazvolenyja da kantralavanaha zvarotu. Leki z hetych śpisaŭ možna ŭvozić u Biełaruś, ale kali rabić heta biez dakumientaŭ i ŭ zanadta vialikaj kolkaści, možna trapić pad kryminalnuju adkaznaść, jak i ŭ vypadku ź pieršym śpisam.
Havorka idzie pra mocnadziejnyja leki: Pavieł zhadvaje mocnyja analhietyki (naprykład, marfin i tramadoł), supraćkašlavyja preparaty nakštałt kadeinu i preparaty dla lačeńnia psichičnych chvarobaŭ, ale raić źviartać uvahu i na inšyja mocnyja leki. Datyčna psichijatryčnych lekaŭ, kaža Pavieł, najbolš aktualnymi buduć bienzadyjaziepinavyja trankvilizatary (dyjaziepam, ałprazałam i h.d.), snatvornaje zołpidem i mietyłfienidat — psichastymulatar, jakija vykarystoŭvajuć dla lačeńnia SDUH.
Jość i čaćviorty śpis lekaŭ, ale ŭ im znachodziacca prekursary — rečyvy, ź jakich vyrablajuć narkatyčnyja srodki i niebiaśpiečnyja psichatropnyja preparaty. Prekursary nie vykarystoŭvajuć u jakaści lekaŭ, tamu vielmi małaimavierna, što kamuści z pacyjentaŭ moža być patrebna ich pravozić u krainu.
Kali vam treba ŭvieźci ŭ Biełaruś mocnadziejnyja leki nakštałt psichatropaŭ ci analhietykaŭ, pierš za ŭsio praviercie, ci jość jany ŭ hetych śpisach — heta možna zrabić tut. Varta pamiatać, što handlovaja nazva preparatu moža adroźnivacca ad jaho mižnarodnaj i chimičnaj nazvy. Infarmacyju pra alternatyŭnyja nazvy lekaŭ praviarajcie ŭ siecivie, taksama ich časta pišuć u instrukcyi da lekaŭ.
Kali vy znajšli patrebny vam preparat u druhim ci trecim śpisie, padrychtujcie dla jaho pieravozki aryhinał ci kopiju recepta. Jašče, kaža Pavieł, treba mieć z saboj dakumient ź piačatkaj i podpisam lekara, jaki śviedčyć, što peŭnamu čałavieku sapraŭdy treba prymać hetyja leki ŭ miedyčnych metach. U dakumiencie musić być paznačana nazva i daziroŭka preparatu, a taksama toje, kolki jaho treba prymać u sutki, u Biełarusi takoj papieraj źjaŭlajecca vypiska ź miedycynskich dakumientaŭ. Kali vam vydali taki dakumient u inšaj krainie, treba mieć z saboj jaho jurydyčna zaćvierdžany pierakład na rasiejskuju ci biełaruskuju movu.
Usie leki z druhoha i treciaha śpisu možna pravozić tolki dla ŭłasnaha karystańnia ŭ kolkaści, jakaja nie pieravyšaje patrebu ŭ preparacie na tydzień, i nie bolš za 90 razavych doz. Preparat, kaža Pavieł, abaviazkova treba zadekłaravać, bo lubaja sproba pravieźci niešta tajemna, navat kali heta nie preparat pad uvahaj dziaržavy, moža być uspryniataja jak kantrabanda i pryvieści da kryminałki. Leki lepš vieźci ŭ cełasnaj zavodskoj upakoŭcy, bo heta paćviardžaje, što preparat nie padmienieny. Da lekaŭ u tabletnicach ci, što jašče horš, va ŭpakoŭkach ad inšych preparataŭ mohuć uźniknuć pytańni.
Pavieł zaŭvažaje, što isnujuć tak zvanyja anałahi «narkatyčnaha srodku i psichatropnaha rečyva». Havorka pra leki, jakija sami pa sabie nie znachodziacca ŭ śpisach, ale pa chimičnaj struktury padobnyja da kantralavanych preparataŭ — naprykład, pra antydepresant buprapijon (viełbutryn). Takija leki sustrakajucca redka, ale kali heta vaš vypadak, vas datyčać usie apisanyja vyšej miery pieraściarohi.
Na ščaście, bolšaść analhietykaŭ i lekaŭ ad psichičnych razładaŭ nie ŭvachodziać u śpisy, i ich pravoz dla ŭłasnaha karystańnia nie maje aznačanych vyšej abmiežavańniaŭ. Ale Pavieł kaža, što nie ryzyknuŭ by vieźci bolš za try ŭpakoŭki takoha preparatu i ŭziaŭ by z saboj recept. Dla hetych lekaŭ nie treba dakumient ad lekara, to ŭ teoryi možna pryvieźci ich i dla znajomych ci rodnych, bo pieradača takich lekaŭ nie źviazanaja z kryminalnaj adkaznaściu.
Jość i leki, jakija ŭ Biełarusi nie ličać narkatyčnymi ci niebiaśpiečnymi i vypisvajuć na zvyčajnym recepturnym błanku, ale ŭ inšych krainach ich zvarot stroha kantralujecca. Heta pryhabalin, habapientyn i zapikłon, a taksama preparaty nakštałt karvałołu i vałakardzinu, jakija ŭtrymlivajuć fienabarbitał. Kali ŭvozić u peŭnyja krainy takija leki biez adpaviednych dakumientaŭ, možna trapić pad kryminalnuju adkaznaść.
Kali majecie sumnievy datyčna pieravozki preparatu, źviartajciesia z zapytam u mytnyja orhany.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
