Centralny rajonny sud horada Arenburha adpraviŭ administratarku bara Pose Dyjanu Kamiljanavu pad aryšt da 18 maja
Bar Pose na vulicy Šaŭčenki ŭ Arenburhu pra siabie zajaŭlaje jak «bar-teatr parodyj» i «načny bar z šou prahramaj». U jakaści zaściarohi kiraŭniki nie pisali jaho adras u sacsietkach.
9 sakavika supracoŭniki MUS razam z bajcami AMAP praviali ŭ bary rejd, zdymki ź jakoha vykłali ŭdzielniki praŭładnaha ruchu «Ruskaja abščyna Arenburha». Naviedvalnikaŭ viečaryny, u tym liku ŭ nižniaj bialiźnie, na kamieru prymusili lehčy na padłohu i ŭstać da ściany. U adroźnieńnie ad siłavikoŭ, tvary naviedvalnikaŭ nie byli zablurany na videa.
Pres-słužba Centralnaha suda Arenburha ŭ svajoj publikacyi ab pasiedžańni ździejśniła aŭtynh aryštavanych: pieršaja detal, jakaja zhadvajecca pra supracoŭnikaŭ Pose, heta toje, što jany sami «asoby ź nietradycyjnaj seksualnaj aryjentacyjaj».
Zhodna z pres-relizam suda, abvinavačanyja, «zjaŭlajučysia asobami ź nietradycyjnaj sieksualnaj aryjentacyjaj, dziejničajučy hrupaj asob pa papiaredniaj zmovie ź nie ŭstanoŭlenymi śledstvam asobami, jakija taksama padtrymlivajuć pohlady i dziejnaść zabaronienaha ŭ našaj krainie mižnarodnaha hramadskaha abjadnańnia ŁHBT», pracavali ŭ bary Rose i zabiaśpiečvali jaho funkcyjanavańnie.
Administratarka bara «padbirała piersanał, kantralavała jakaść absłuhoŭvańnia naviedvalnikaŭ bara, zaćviardžała prahramy vystupleńniaŭ i mierapryjemstvaŭ, zabiaśpiečvała fota– i videazdymku vystupleńniaŭ, jakija prapahandujuć nietradycyjnyja sieksualnyja adnosiny, a taksama vykonvała finansava-haspadarčyja funkcyi».
Art-dyrektar bara «ažyćciaŭlaŭ padbor travieści-artystaŭ, pravodziŭ ź imi schody, prapahandavaŭ siarod naviedvalnikaŭ bara i ŭ mabilnym dadatku Telegram nietradycyjnyja seksualnyja adnosiny».
Artykuł ab arhanizacyi pracy ekstremisckaj arhanizacyi ŭ Rasii praduhledžvaje da 10 hadoŭ pazbaŭleńnia voli (častka 1 artykuła 282.2 KK). Viarchoŭny sud Rasii pa patrabavańni Miniusta pryznaŭ «mižnarodny ruch ŁHBT» ekstremisckim u śniežni 2023 hoda, rašeńnie ŭstupiła ŭ siłu 10 studzienia 2024-ha.
Čytajcie taksama:
Rasijskaja škoła pakajałasia za ranišnik, jaki prajšoŭ pa matyvach savieckaha mulcika «Nu, pačakaj»
Z «Jandeks Kart» źnikli nazvy Ehiejskaha mora i vostrava Lesbas
Z rasijskich muzyčnych anłajn-płatformaŭ vydalili «Hołubuju łunu»
