«Kraski»
«Oranžievoje sołncie», «Staršyj brat», «A on nie znajet ničieho» − na kožnaj školnaj dyskatecy biełaruskija školniki nulavych uprošvali pastavić hetyja chity. Hurt «Kraski» źjaviŭsia ŭ 2001 hodzie i amal adrazu zdabyŭ papularnaść, a jaho salistka Aksana Kavaleŭskaja stała kumiram dla dziaŭčynak nie tolki ŭ Biełarusi, ale i za jaje miežami.
Fota z sajtu euroradio.fm
Za 2001-2002 hady «Kraski» dali 172 kancerty, paśla čaho kalektyŭ vyrašyŭ skarać rasijskuju estradu. U 2003 hodu zdaryŭsia skandał. Tady śpiavačka znajšła pirackija dyski sa svaimi pieśniami ŭ adnoj ź dziaržaŭnych kram, a kancertny dyrektar hurta zapatrabavaŭ razabracca z pytańniem parušeńnia aŭtarskich pravoŭ. U chutkim časie ŭ minski ofis hurta ŭvarvalisia siłaviki, a pradstaŭnikoŭ hrupy abvinavacili ŭ vymahalnictvie. Paśla hetaha «Kraski» kančatkova źjechali ŭ Maskvu.
U 2006 hodzie napiaredadni vybaraŭ prezidenta ŭ Biełarusi hurt padtrymaŭ Alaksandra Milinkieviča. «Kraski» raspaŭsiudzili zvarot:
«My nie pa čutkach viedajem, što takoje režym Łukašenki. My zmušanyja byli biehčy spačatku ŭ Niamieččynu, potym u Rasiju, a zatym u ZŠA. Ale realnaść bolš žorstkaja, čym nam by taho žadałasia, i ŭsia nadzieja zaraz tolki na vas i našu ahulnuju pieramohu!».
Praź niekalki hadoŭ u intervju «Našaj Nivie» Aksana Kavaleŭskaja ad usiaho admaŭlałasia. Voś što jana kazała: «Ja zaŭsiody padtrymlivała Alaksandra Ryhoraviča Łukašenku. Toje, jak mianie imknulisia vystavić, było tolki pijar-chodam, absalutna nie ŭzhodnienym sa mnoj asabista!».
U 2006 hodzie Kavaleŭskaja syšła z hurta — jana była ciažarnaja druhim synam, ale jašče da rodaŭ razyšłasia z mužam Alaksiejem Voranavym, jaki byŭ pradziusaram «Krasok». Jaje miesca ŭ hurcie zajmali inšyja dziaŭčyny, ale papularnaść patrochi sychodziła.
Aksana Kavaleŭskaja. Fota ź instahrama śpiavački
Sama ž Aksana pačała vystupać solna. Ale ž nivodny z novych trekaŭ nie zalacieŭ, jak by skazali b u 2024, u trendy. Bačačy heta, artystka pačała śpiavać svaje chity nulavych. Rasijskija ŚMI pisali ab tym, što były muž sprabavaŭ zabaranić Kavaleŭskaj karystacca repiertuaram «Krasak», ale, zdajecca, u jaho ničoha nie atrymałasia. Bo Aksana i siońnia śpiavaje ŭ roznych kłubach (i kaniečnie, na retra «supierdyskatekach») «Oranžievoje sołncie».
Žančyna žyvie ŭ Maskvie, ale jaje davoli časta zaprašajuć na dni horada ŭ roznyja miescy Rasii. Kali mierkavać pa rajdary, jaki jość u ahulnym dostupie, to ŭ minułym hodzie zaprasić Kavaleŭskuju na niejkaje mierapryjemstva kaštavała ad 3 tysiač dołaraŭ.
Darečy, u 2020 hodzie Aksana Kavaleŭskaja źbirałasia vystupić na praŭładnym kancercie 8 žniŭnia ŭ Breście, ale ŭ vyniku admoviłasia (jak i šmat inšych śpievakoŭ).
Merry Poppins
Dźvie siastry — Alesia i Maryna Bierułavy — spačatku razam śpiavali ŭ rok-hurcie «Mantana». Ale ŭ 2004 hodzie skončyŭsia ich kantrakt sa studyjaj «Sajuz». Dziaŭčyny adpravilisia ŭ Japoniju zarabić hrošaj. Tam jany zachapilisia stylem japonskaj mody Gothic & Lolita i muzyčnym napramkam sinci-pop. Viarnuŭšysia ŭ Minsk, siostry stvaryli sinci-pop-hurt Merry Poppins.
Skrynšot videa «Kartinki» hurta Merry Poppins
Zdajecca, u śpiavačak usio dobra atrymlivałasia: jany vystupali ŭ roznych krainach (navat da Japonii dabralisia), atrymlivali muzyčnyja ŭznaharody, zdymalisia dla eratyčnych fotasiesij mužčynskich žurnałaŭ Maxim, Penthouse i Playboy. Miž inšym, vikipiedyja z honaram infarmuje, što Merry Poppins staŭ pieršym biełaruskim muzyčnym hurtom, nadrukavanym u Playboy — artystkam pryśviacili ažno vosiem staronak.
U 2008 hodzie vyjšaŭ studyjny albom, jaki zapisvali 4 hady ŭ studyjach Minska i Maskvy. Ale ŭ apošni momant jaho nazvu źmianili z zajaŭlenaha «Baterflaj» na Do svidania. Alesia Bierułava prakamentavała heta tak: «Niejki asablivy padtekst u źmienie nazvy šukać nie treba. Prosta my vierniemsia, kali viecier pieramienicca!». Adrazu paśla hetaha hurt pierastaŭ isnavać.
Paźniej Alesia tłumačyła «Našaj Nivie» toje rašeńnie prosta: chaciełasia syści na piku. Jana taksama adkazała, čamu ŭ svoj čas vyrašyła źjechać ź Biełarusi ŭ Rasiju:
«Na žal, u 2006 hodzie tak skłałasia situacyja ŭ Biełarusi, što tam mnie stała niaŭtulna. Nie praź ludziej, maje samyja lubimyja ludzi — heta jakraz biełarusy. Składana było niečym zajmacca, raści. Niejki zastoj byccam by pačaŭsia. Moža, tamu, što ŭłada nie mianiałasia? Nie viedaju, ja ŭ hetym nie nadta raźbirajusia. Ale ja adčuvała: što voś ściana, a voś stol − i ŭsio. Dalej Dažynki, klipčyk za paru tysiač, bo za 15 tysiač zdymać — tak i nie adabješ… Voś takija niejkija ciažkaści pačalisia».
Alesia Bierułava. Fota ź jaje instahrama
U 2016 hodzie Alesia zajaviła ab adradžeńni hrupy «Mantana». U adnym ź intervju žančyna raspaviała, što novyja muzykanty sami adšukali jaje i ŭhavaryli vystupać razam, śćviardžajučy, što vyraśli na jaje pieśniach.
U 2020 hodzie artystka nazirała za tym, što adbyvałasia ŭ Biełarusi: «U mianie navat była sapraŭdnaja depresija: čałaviek piać maich siabroŭ pabyvali ŭ turmie. Dla mianie heta ŭsio było vielmi sumna i tryvožna, strašna i horka, i da hetaha času ja vielmi chvalujusia z-za taho, što tam adbyvajecca. Niejak vielmi… navat nie vierycca, što ŭsio heta adbyvałasia nasamreč i što da hetaha času «visić» usio. Ja telefanavała svaim siabram stała, pytałasia: žyvyja? I kali ja baču, jak dzicia sadžajuć, jak čałavieka prymušajuć niešta kazać na kamieru… u mianie heta vyklikaje žach. I źbiantežanaść».
Litaralna niekalki dzion tamu «Mantana» anansavała vialiki kancert u Maskvie 15 lutaha: u prahramie zajaŭlenyja najlepšyja pieśni za apošnija 25 hadoŭ, a taksama zusim novyja kampazicyi.
Alesia Biarułava taksama pracuje i jak hieštalt-terapieŭtka. Cikavaść da psichałohii ŭ žančyny źjaviłasia ŭ toj čas, kali jana była zamužam za viadomym muzykantam Siarhiejem Michałkom.
«Choć u jaho z druhoha alboma pačalisia ciažkaści z ałkaholem, ale zatoje z hetaha pačałasia maja psichałahičnaja dziejnaść. Spačatku ja na im treniravałasia, − kazała Alesia ŭ intervju «Našaj Nivie». — Prosta vielmi šmat ź im zajmałasia, važdałasia, starałasia niejak advučyć jaho pić. U vyniku ŭsio atrymałasia, voś tolki, na žal, usie maje pačućci na heta i syšli».
Maryna Biarułava. Fota ź jaje instahrama
Maryna Biarułava zaraz taksama pracuje ŭ Maskvie jak psichałahinia, art-terapieŭtka i cialesna-aryjentavanaja terapieŭtka. Pracuje z temami adnosin, emacyjnaj zaležnaści, prablemami ŭ seksie, tryvohaj i stracham.
«Toples»
U 2005 hodzie ŭ Biełarusi źjaviłasia «svaja «Viahra» − mienavita tak pazicyjaniravali hurt «Toples». Ale ž treba adznačyć, što z hetym papularnym hurtom vielmi lubić paraŭnoŭvać luby biełaruski hiorłs-bend.
Hurt «Toples» u nulavyja. Fota z sajtu sport24.ru
Darečy, u 2023 hod «Toples» u čarhovy raz adradziŭsia. Za ŭsiu historyju jaho salistkami byli bolš za 15 dziaŭčat. I šmat ź ich chto zmoh uładkavać asabistaje žyćcio — žartavali navat, što «Toples» − heta fabryka niaviest. Artysty, biznesmieny i spartsmieny zabirali vakalistak zamuž.
Čaho vartaja tolki historyja kachańnia Anastasii Kasiankovaj i futbalista Alaksandra Hleba. A paznajomilisia jany padčas eratyčnaj fotasiesii. Maładuju śpiavačku i viadomaha spartsmiena niejkim cudam uhavaryli zrabić davoli adkrytyja zdymki dla spartyŭnaj haziety «Priessboł». Raman raźvivaŭsia nastolki imkliva, što ŭžo na trecim spatkańni Hleb zrabiŭ prapanovu ruki i sercy. Para ŭpotaj schadziła ŭ ZAHS i jašče hod chavała ad usich navinu ab viasielli.
Siamja praisnavała kala siami hadoŭ, a potym raźviałasia. Pletkary kazali, što Alaksandr maryŭ pra žonku, jakaja budzie naradžać dziaciej i varyć barščy, a Anastasiju złavała rol dadatka da zornaha futbalista.
U 2017 hodzie Anastasija znajšła eratyčny sposab nahadać pra siabie publicy i apublikavała ŭ sacsietkach videa, dzie jana ŭ davoli adkrytym topie sprabuje kasić travu ručnoj kasoj. Jano chutka raźlaciełasia pa miedyja.
Anastasija Kasiankova. Fota z sajta sport24.ru
Ciapier jana viadzie mienš miedyjny ład žyćcia i navat vydaliła staronku ŭ instahramie. U minułym hodzie źjaviłasia infarmacyja, što Anastasija zamužam za biełaruskim arhanizataram kancertaŭ Paŭłam Bahdanovičam. A pracuje jana ŭ śfiery turbiznesu.
Volha Hałyhina (Vajniałovič). Fota ź jaje instahramu
Volha Vajniałovič pačała budavać karjeru madeli jašče kali vučyłasia ŭ škole. Ale potym usio ž vyrašyła, što bačyć siabie śpiavačkaj. Jana paśpiachova prajšła kastynh u novy hurt «Toples» — i prykładna ŭ toj ža čas paznajomiłasia z komikam Vadzimam Hałyhinym. Hałyhin u toj momant jašče byŭ žanaty, tamu, zhodna z aficyjnaj viersijaj, adnosiny ŭ jaho z haračaj śpiavačkaj pačalisia tolki paśla razvodu. U 2010 hodzie šoumen zrabiŭ davoli efiektnuju prapanovu ruki i serca: jana prahučała sa sceny fiestyvalu Comedy Club u Turcyi.
U vyniku Volha stała treciaj žonkaj Hałyhina. U pary dvoje dziaciej. Volha čas ad času źjaŭlałasia ŭ niejkich šou na TNT. Ale zaraz vydatkoŭvaje ŭsie siły i čas na kłopat pra muža i synoŭ. Pa staroj zvyčcy rasijskija ŚMI paznačajuć jaje ŭ artykułach jak śvieckuju lvicu.
Śviatłana Lis. Fota ź jaje instahramu
A voś vieterankaj kalektyvu možna ličyć Śviatłanu Lis. Jana źjaviłasia ŭ «Toples» u 2009 hodzie. Ale potym pryznałasia, što ŭ jaje nie atrymałasia pieramahčy bojaź sceny, tamu jana ŭ vyniku stała pradziusarkaj i zaraz zajmajecca jakraz pradziusiravańniem hurta «Toples». U dadzieny momant kalektyŭ znoŭ šukaje «strojnuju dziaŭčynu, jakaja śpiavaje».
Hurt «Toples» zaraz. Fota ź instahramu Śviatłany Lis
Čytajcie taksama:
Aksana Kavaleŭskaja: Siońniašnija «Kraski» jeździać i adkryvajuć rot pad moj hołas
