Святлана Ціханоўская. Фота: ОСЦ
Сустрэчы з уладамі Нарвегіі запланаваныя падчас візіту беларускага дэмакратычнага лідара Святланы Ціханоўскай у Осла 29—30 красавіка, паведаміў «Позірку» галоўны дарадца палітыка Франак Вячорка.
29 красавіка дэмлідар сустрэнецца з прадстаўнікамі даследчых цэнтраў, грамадзянскай супольнасці і асобнымі журналістамі; правядзе перамовы з членамі парламенцкага камітэта па замежных справах і абароне, а затым — са спікерам Стортынга Масудам Гарахані. Запланаваная адкрытая сустрэча з Нарвежскім Хельсінкскім камітэтам і беларускай дыяспарай у асобах членаў супольнасці Razam. Праграма завершыцца вячэрай, якую арганізуе намеснік міністра замежных спраў Эйвінд Вад Петэрсан.
У другі дзень візіту Ціханоўская правядзе перамовы з кіраўніком МЗС Эспенам Бартам Эйдэ, прэм’ер-міністрам Ёнасам Гарам Сторэ, прадстаўнікамі парламенцкай групы «За дэмакратычную Беларусь», мэрам Осла Аннэ Ліндбу, генеральным дырэктарам Дэпартамента палітыкі бяспекі і Крайняй Поўначы ў МЗС, міністрам культуры Любнай Яферу. Дэмлідар таксама выступіць на канферэнцыі Words Matter!
Паводле слоў Вячоркі, гэта «доўгачаканы, запланаваны» візіт. З прадстаўнікамі нарвежскіх уладаў плануецца абмеркаваць пытанні «павелічэння фінансавання незалежных СМІ, грамадзянскай супольнасці і беларускіх культурных ініцыятыў, падтрымкі для рэабілітацыі былых палітвязняў і дзяцей рэпрэсаваных».
«Нарвегія ўжо падтрымлівала сем’і рэпрэсаваных, палітвязняў, але мы зараз будзем казаць пра больш сістэмную праграму рэабілітацыі палітвязняў», — адзначыў галоўны дарадца палітыка.
«Ну і дыпламатычны трэк — каб Нарвегія фармалізавала стасункі з дэмакратычнымі сіламі», — дадаў ён, патлумачыўшы, што гаворка ў тым ліку пра сумесныя дзеянні ў міжнародных арганізацыях.
Нагадаўшы, што Нарвегія не ўваходзіць у Еўрасаюз, Вячорка падкрэсліў важнасць для дэмсіл таго, каб Осла «сінхранізаваў з ЕС і ЗША стратэгію па пытанні санкцый, прыцягнення рэжыму да адказнасці».
На сустрэчы з уладамі, паводле яго слоў, таксама будуць абмяркоўвацца тэмы працы групы падтрымкі дэмакратычнай Беларусі ў нарвежскім парламенце; абмену інфармацыяй па пытаннях бяспекі і вайсковых пытаннях; падтрымкі беларускай дыяспары і легалізацыі.
«Нарвегія ўжо аказвае дапамогу — яна далучылася да міжнароднай платформы па зборы доказаў злачынстваў Лукашэнкі, кааліцыі «За дэмакратычную Беларусь» у АБСЕ. Нарвегія на афіцыйным узроўні змяніла назву «Белая Расія» на «Беларусь» (Hviterussland на Belarus), падтрымала нас на міжнародным узроўні. Нарвегія вельмі цвёрда нас падтрымлівае з 2020 года, нават раней. Вельмі прынцыповыя, паслядоўныя, надзвычай важны кантакт і важны голас», — падсумаваў Вячорка.
Чытайце таксама:
Ціханоўская заклікала ўладальнікаў гуманітарных ДНЖ не ездзіць у Беларусь
Як змяніўся вобраз Ціханоўскай за 2020—2024 і як яна глядзіцца побач з іншымі лідаркамі ШМАТ ФОТА
