Дом у Оршы, дзе жыла сям'я Куранковых. Фота: Іна Рашкевіч / vkurier.by
Крыніца «Медыязоны», блізкая да сям'і, сцвярджае, што дзяцей знайшла іх бабуля.
«Усе суседзі расказваюць, што яна адчыніла дзверы сваім ключом. Прыйшла, бо не магла датэлефанавацца. І ўбачыла там Ірыну ў крыві, таму што тая спрабавала вены парэзаць. І дзяцей. Кажуць, яны ў радок ляжалі», — расказвае крыніца.
Па словах крыніцы, у сям'і было шасцёра дзяцей: трое вучыліся ў школе № 20 у Оршы. Старэйшы сын — у 11 класе, ягоны брат — у 8-м, сястра — у першым. Яшчэ тром дзецям было ад года да пяці гадоў.
У дзяцей Ірыны былі розныя бацькі. Прадстаўнік Генпракуратуры расказаў, што ўсе яны «вялі амаральны лад жыцця і з дзецьмі не пражывалі». У доме часта не было ежы для дзяцей.
Па словах крыніцы, саму Ірыну не бачылі п'янай, але часта быў п'яны яе муж. Крыніца сцвярджае, што ён збіваў яе — знаёмыя бачылі яе з сінякамі ў дзіцячым садку.
Інфармацыю Генпракуратуры, што цяперашні муж жанчыны і бацька аднаго з дзяцей цяпер знаходзіцца ў ЛПП, пацвердзіла і крыніца «Медыязоны»: з яе слоў, мужчыну адправілі туды прыкладна паўгода таму.
Паводле інфармацыі былых сілавікоў з «Белпола», мужа Ірыны завуць Дзмітрый Куранкоў. З 2004 года ён працаваў зваршчыкам на заводзе «Легмаш» і больш за 10 разоў прыцягваўся да адміністрацыйнай адказнасці за знаходжанне ў стане алкагольнага ап'янення. Сама ж Ірына працавала на Аршанскім ільнокамбінаце аператарам машыннага абсталявання.
Дом № 3 на вуліцы Завадскага, дзе жыла сям'я, быў здадзены ў 2017 годзе. Тады «Аршанская газета» пісала, што яго жыхарамі сталі «аршанцы, якія маюць права на сацыяльнае жыллё і маюць патрэбу ў паляпшэнні жыллёвых умоў».
Па словах знаёмых, сям'я жыла бедна, у кватэры не было пральнай машыны. Адна з суседак аднойчы збірала па горадзе дапамогу для іх — цацкі і адзенне для дзяцей.
Чытайце таксама:
Чацвёра дзяцей у Оршы былі задушаныя. Пракуратура выступіла з заяваю
Мужа забіралі ў ЛПП, і маці задушыла чатырох дзяцей, каб не аддаваць іх сацапецы