Публікацыя з рэпостам інструкцыі праіснавала некалькі секунд і была выдалена
У паведамленні гаворыцца пра тое, што ідэолагам даслалі ліст пад грыфам «для службовага карыстання» з заданнем пазначыць IP-адрасы, з якіх падключаюцца да інтэрнэту спецыялісты аддзелаў па інфармацыйна-аналітычнай рабоце.
Існаванне такіх аддзелаў і сектараў не афішуецца — інфармацыі пра іх няма на сайтах раённых адміністрацый, як і пра існаванне такога накірунку работы ў абласным камітэце ідэалогіі. Пра дзейнасць такіх аддзелаў вядома толькі праз ускосныя ўзгадкі ў публікацыях дзяржаўнай прэсы.
Раней «Флагшток» высветліў, што начальнікам аддзела інфармацыйна-аналітычнай работы і маніторынгу камітэта ідэалагічнай работы і па справах моладзі Гомельскага аблвыканкама з'яўляецца Дзмітрый Ісачанка, які кантралюе трэш-канал «Говорит Гомель» і хаваецца пад нікам Hejter.
Цяпер стала вядома, што ён не выдаляў свой службовы акаўнт, а толькі памяняў нік на «Тутэйшы». Менавіта пад ім Ісачанка перапісваецца з іншымі ідэолагамі. Пра гэта гаворыць інфармацыя з тэлеграм-бота, які фіксуе старыя даныя тэлеграм-акаўнтаў.
Дзмітрый Ісачанка
У дасланай Ісачанкам інструкцыі, меркавана, вядзецца гаворка пра стварэнне лакальнай сеткі — гэта можа быць сэрвіс перасылкі дакументаў ці камунікацыі чыноўнікаў.
З ліста таксама вынікае, што падначаленым Ісачанкі ў ягоным сакрэтным аддзеле з'яўляецца Яўген Усцюшкоў. Гэта былы бээрсээмавец, які, паводле ранейшых узгадак пра яго, дагэтуль працаваў галоўным спецыялістам аддзела інфармацыйна-аналітычнай і арганізацыйна-кадравай работы Гомельскага абкама БРСМ як мінімум з 2019 года па 2021.
Яўген Усцюшкоў
Таксама дзякуючы інфармацыі пра акаўнт Ісачанкі можна меркаваць, чым займаюцца такога кшталту спецыялісты. «Тутэйшы» з'яўляецца ўдзельнікам многіх чатаў, дзе абмяркоўваюць грамадскія праблемы, пратэсных чатаў, у тым ліку супольнасцяў беларусаў за мяжой. Акрамя таго, ідэолаг падпісаны на суполку дапамогі тым, хто шукае ўкраінцаў, вывезеных у Беларусь.
Інфармацыя пра акаўнт «Тутэйшы»
Цікава, што яшчэ адзін былы бээрэсэмавец Аляксей Зайцаў, які працаваў першым сакратаром Цэнтральнага раённага камітэта БРСМ Гомеля, цяпер працуе загадчыкам сектара інфармацыйна-аналітычнай работы ўпраўлення ідэалагічнай работы, культуры і па справах моладзі Гомельскага гарвыканкама. Такім чынам, кадры «ідэолагаў-аналітыкаў» фармуюць, як правіла, з бээрсээмаўцаў.
Скрыншот сайта «Гомельскіх ведамасцяў»
Чытайце таксама:
