Ілюстрацыйны здымак. Фота: ЦБС
На 31 снежня 2023 года ў Польшчы пражывала амаль 119 тысяч грамадзян Беларусі, якія маюць дакумент, выдадзены ў Польшчы і які дае права на знаходжанне на тэрыторыі краіны. У жніўні 2020 года ў Польшчы было ўсяго 28 тысяч такіх грамадзян Беларусі.
Колькасць пазітыўных рашэнняў аб прадстаўленні дазволаў на часовае знаходжанне ў 2023 годзе была ў два разы вышэйшай, чым год таму. Гэта звязана са спрашчэннямі ў заканадаўстве для грамадзян Беларусі, якія лабіявалі юрысты ЦБС.
За 2023 год беларусы атрымалі каля 59 тысяч дазволаў на знаходжанне ў Польшчы, 57% з іх былі прадастаўлены мужчынам.
56% дазволаў былі выдадзены на падставе працы, 14% на падставе ўзʼяднання сямʼі, 3% на падставе вучобы, 27% на іншых падставах.
Ва ўпраўленні па справах замежнікаў зафіксавалі два пікі міграцыі беларусаў у Польшчу. Першым стаў перыяд пасля сфальсіфікаваных выбараў 2020 года, другі ж адбыўся пасля пачатку пуцінскай вайны супраць Украіны.
З 118 562 грамадзян Беларусі:
- 39 553 маюць пастаянны дазвол на жыхарства,
- 69 399 часовы дазвол на жыхарства,
- 6555 дадатковую абарону,
- 1160 дазвол на знаходжанне доўгатэрміновага рэзідэнта ЕС,
- 436 часовую абарону,
- 578 статус бежанца,
- 881 маюць іншыя падставы.
Міжнародная абарона
Агульная колькасць беларусаў, якія звярнуліся па атрыманне міжнароднай абароны ў Польшчы пачынаючы з 30 верасня 2020 года, склала 9512 чалавек.
У 2020 годзе было пададзена 407 заяў,
у 2021 годзе — 2257 заяў,
у 2022 годзе — 3132 заявы,
у 2023 — 3713 заяў.
«На жаль, мы можам канстатаваць працяг трэнду на павелічэнне колькасці зваротаў па міжнародную абарону ў Польшчы. Гэта можа сведчыць, што ўзровень рэпрэсіяў у Беларусі, як мінімум, не змяншаецца», — піша ЦБС.
З 2021 года грамадзяне Беларусі сталі самай буйной групай, якая падае заявы аб атрыманні міжнароднай абароны ў Польшчы. Пры гэтым з 2021 па 2023 год у міжнароднай абароне было адмоўлена толькі 81 грамадзяніну нашай краіны. Пазітыўныя рашэнні па сваіх справах атрымалі каля 99% беларусаў.
На 31 снежня 2023 года на разглядзе знаходзілася 1403 справы.
Заявы аб атрыманні міжнароднай абароны складаюць толькі 4% ад агульнай колькасці заяў, пададзеных з мэтай легалізацыі знаходжання ў Польшчы.
