У эфіры тэлеканала АНТ (праграма «Нічога асабістага») беларуская спявачка, заслужаная артыстка краіны выказалася пра артыстаў, што былі вымушаныя з'ехаць з краіны, заўважыла «Камсамолка».
Па словах спявачкі, сёння ў Беларусі даюць карт-бланш маладым артыстам, у якіх вераць, але пазней кожны мусіць паказаць сябе ў працы. Што датычыць калег, якія апынуліся за межамі Беларусі пасля падзей 2020 года, Дарафеева сказала так:
— Судзіць калег мне вельмі складана … гэта такія рытарычныя, маральныя пытанні. Не судзіце, каб вас не судзілі. Магу толькі сказаць, што я вельмі суперажывала ім, з аднаго боку, але ёсць рэчы, якія асабіста я не магу ні прыняць, ні зразумець, ні ў чымсьці дараваць.
Артыстка падзялілася сваім бачаннем прычын, па якіх некаторыя публічныя персоны выказваліся супраць улад краіны:
— Думаю, што многія проста паддаліся нейкаму ўплыву, ходу падзей, ціску. Хтосьці захацеў занадта хутка неяк прапіярыцца. Але я не ўпэўненая, што ўсе так проста разумелі, што яны робяць на той момант.
Дарафеева лічыць, што калі няма выразнай пазіцыі, то чалавек «проста ціхенька дзесьці нешта лайкае», не разабраўшыся ў сітуацыі.
— Я думаю, што многія з гэтых людзей ужо, можа быць, сто разоў пашкадавалі, што яны дзесьці памыліліся, спатыкнуліся. Але я лічу, што час павінен прайсці, каб чалавек сапраўды перахварэў, зразумеў, дзе ён не меў рацыі, раскаяўся, — заявіла заслужаная артыстка.
Паводле яе слоў, яна пакуль не гатова выйсці на сцэну нават з тымі артыстамі, што пакаяліся пасля выезду з Беларусі.
— Час павінен прайсці. Ведаеце, час лечыць, час усё расстаўляе на свае месцы. Калі мяне хтосьці вельмі моцна крыўдзіць, я заўсёды імкнуся адысці. Можа быць, людзі на нейкім этапе зрабілі свой выбар, — сказала Дарафеева.
Спявачка кажа, што рашэнне вярнуцца ў Беларусь павінна быць падмацавана ўчынкамі, іх тлумачэннем і апраўданнем.
— Трэба ўнесці нейкі свой пасіўны ўклад, — сказала Дарафеева, правёўшы паралель са злачынцамі, якія «выпраўляюцца, ёсць нейкія папраўчыя работы, час, які там працуе на тое, каб яны сваю віну загладзілі».
Таксама заслужаная артыстка дадала:
— Сярод маіх калег, асабліва моладзь, дзеці хутка паддаваліся нейкаму ўплыву, не разумеючы нават, што адбываецца. Яны хутка ўключаліся: так, пойдзем, кветачкі, там прыгожа, надвор'е, прырода. А ўсе засядзеліся, пандэмія была — так хацелася ім дыхаць, свабоды нейкай. А потым прайшоў час і яны пачалі разумець.
Чытайце таксама:
Міністр культуры: Здраднікам не месца на сцэне
Міністр культуры прызнаў дэфіцыт кадраў у беларускай культуры. З гэтай нагоды сабралі цэлую нараду
