Mija Mitkievič. Fota z asabistaha archiva hieraini
12 kastryčnika 2020 hoda dla Mii staŭ tym dniom, jaki, jak havorać, padzialiŭ žyćcio na «da» i «paśla» — tady da jaje pryjšli ź pieratrusam.
— Nikoli nie zabudu hety dzień i toje, što adčuvała tady. Doma była tolki maja babula, jakoj 87 hadoŭ. Vy možacie sabie ŭjavić, jak jana spužałasia?! Ja znachodziłasia na pracy — u mianie było svajo ivent-ahienctva. Ja sustrakałasia z padradčykami, pravodziła schod nakont dalejšych našych płanaŭ. I tut raptam patelefanavali. Navat nie mnie, a majmu kalehu. Niekali daŭno ŭ Life była akcyja, i ja nabyła adrazu niekalki simak — adna ź ich była ŭ jaho telefonie. Jon prybieh ź inšaha kabinieta i kryčyć: «Mija, zdajecca, tabie telefanujuć z MUS!»
Uziaŭšy telefon, žančyna pačuła: «Dobry dzień, Mija Siarhiejeŭna. Heta opierupaŭnavažany Jaŭhien Nikanienka. Terminova pryjazdžajcie dadomu. U nas da vas jość pytańni».
Mija chutka pabiehła. Jana zdalok pabačyła troch cicharoŭ pobač z domam, jašče niekalki na paviersie. U kvatery taksama byli siłaviki.
Toj samy Jaŭhien Nikanienka prademanstravaŭ žančynie skrynšoty jaje akaŭnta va «Ukantakcie».
— Jon spytaŭ, ci maja heta staronka i ci pisała ja hetyja pasty. Ja adrazu pačała ad usiaho admaŭlacca. Reč u tym, što na pratesty ŭ toj čas ja vychodziła zusim u inšym horadzie. Dumała, što bilinh telefona budzie śviedčyć na maju karyść. Adkazała, što liču, što maju staronku ŭzłamali, a pra niejkija pasty ja ničoha nie viedaju.
U hety momant Mija zrazumieła, što nie bačyć svajho sabaku i pačała chvalavacca.
— Ja zabiahaju ŭ pakoj i baču, što jany začynili sabaku na bałkonie. Chacieła jaho krychu supakoić, kab jon pierastaŭ bicca ŭ dźviery, ale da mianie padyšoŭ adzin ź cicharoŭ i pačaŭ kryčać: «Nie adčyniaj dźviery!». Na «ty», z takoj niepavahaj, byccam by heta ja ŭvarvałasia ŭ jaho dom. Jon vioŭ sabie nieadekvatna, piać razoŭ paŭtaryŭ adno i toje ž.
U Mii zabrali noŭtbuk i telefon. Žančyna kaža, što dumki ŭ jaje byli nie samyja aptymistyčnyja: jana razumieła, što chutčej za ŭsio ŭ siłavikoŭ užo jość i fota z pratestaŭ, i toje, što jana pisała, jašče navat da 2020 hoda.
Potym niekalki miesiacaŭ Mija była na voli. U studzieni 2021 hoda da jaje pryjechali znoŭ:
— Na parozie źjaviŭsia toj samy Nikanienka: «Nu što, Mija Siarhiejeŭna, budziem pryznavacca ci pajechali ŭ IČU?». Ja adkazała: «Pajechali». Kali my vyjšli z padjezda, jon pačaŭ pahražać majoj siamji. Ja vielmi spužałasia i skazała, što pryznaju vinu.
Na pytańnie, ci nie było žadańnia źbiehčy z krainy paśla pieratrusu, Mija kaža, što, pa-pieršaje, ułady apieratyŭna abmiežavali joj vyjezd z krainy. Pa-druhoje, jana vieryła ŭ chutkuju pieramohu. Dumała, što maksimum u listapadzie ŭsio skončycca i tady, kaniečnie, nijakaj kryminalnaj spravy nie budzie.
Mii inkryminavali raspalvańnie sacyjalnaj varožaści. Pavodle materyjałaŭ spravy, jana «z metaj uzbudžeńnia varožych adnosin i padryvu davieru da milicyi na svajoj staroncy va «UKantakcie» 26 vieraśnia, 3 i 10 kastryčnika 2020 hoda raźmiaściła vyjaŭlenyja ŭ nieprystojnaj formie paviedamleńni. U ich jana zaklikała da hvałtoŭnych dziejańniaŭ u dačynieńni da supracoŭnikaŭ AUS».
Fota z asabistaha archiva hieraini
20 maja 2021 sudździa Alena Šylko vyniesła prysud Mii Mitkievič — try hady pazbaŭleńnia voli ŭ kałonii ahulnaha režymu. Adbyvać pakarańnie jaje adpravili ŭ papraŭčuju kałoniju №4 u Homieli.
— Da mianie ŭsio vielmi tuha dachodziła. Nu jak — tuha? Z ulikam taho, praź jakuju miasarubku ja prajšła — u mianie pieryjadyčna nie było mahčymaści navat dumać. Ja nie jeła i nie spała, u mianie było fizičnaje źniasileńnie, z-za jakoha ja drenna ciamiła.
U PK №4 źniavolenyja pracujuć na pradpryjemstvie, jakoje nosić ścipłuju nazvu «Dziaržaŭnaje pradpryjemstva №4». Jaho sajt śćviardžaje, što heta — «adzin ź viadučych biełaruskich vytvorcaŭ śpiecyjalnaha, rabočaha i formiennaha adzieńnia», a taksama vychvalajecca: «Našy mahčymaści, dośvied i vysokaja jakaść pradukcyi dazvolać supracoŭničać ź lubymi zakazčykami».
Atrady padzieleny: pałova chodzić na pracu ŭ pieršuju źmienu, pałova ŭ druhuju. A praz tydzień naadvarot.
— Pieršaja źmiena pačynałasia a 7-j ranicy — u 6.40 treba być užo na fabrycy. U 14.30 źmiena zakančvałasia — na fabrycy zvaniŭ zvanok i my ŭsie stroilisia na płacu. Potym była hadzina ŭmoŭna volnaha času. Ale zvyčajna ciabie vyklikajuć u śpiecadździeł ci jašče kudyści. U 16.00 hadzin pravierka. U 16.30 — «Viektar» (prahlad navin, jakija nam nie pakazvali). Paśla viačera i znoŭ «Viektar». Potym tearetyčna volny čas, ale znoŭ ža moža być roznaje — mohuć pasłać na pramzonu, dzie treba niešta prybrać.
Surazmoŭca padkreślivaje, što najbolš žachlivyja ŭmovy stvarali dla tych, chto apynuŭsia ŭ kałonii mienavita ŭ 2021 hodzie. Mii było zabaroniena vučycca, jak inšym asudžanym, naviedvać niejkija zabaŭlalnyja mierapryjemstvy ŭ kłubie, zajmacca ŭ spartyŭnaj zale. Joj dazvalali tolki byvać u biblijatecy i ŭ sančastcy i tolki ŭ supravadžeńni staršyni abo zahadčyka haspadarki.
Mija havoryć, što jaje pastajanna treciravali, a staŭleńnie było jak da žyvioły.
— U niejki momant ja zrazumieła, bolš nie vytrymaju. Pryjšła da načalnika kałonii, pakłała jamu na stoł svajo zaviaščańnie i skazała: «Vizirujcie i adpraŭlajcie nataryusu».
Heta było za dva miesiacy da majho vyzvaleńnia. Dva hady ja prachodziła sapraŭdnaje piekła, bieź pierapynku. Ja kazała, što lepiej by mianie katavali na Akreścina. Lepš fizičny hvałt, čym PK №4 Homiela. Žanočaja kałonija nie idzie ni ŭ jakoje paraŭnańnie z mužčynskaj.
Mija kaža, što tolki paśla historyi z zaviaščańniem jaje narešcie pakinuli ŭ spakoi.
Dva miesiacy tamu žančyna pierajechała ŭ Varšavu. U chutkim časie jana adkryje ŭłasnuju studyju tancaŭ — balnyja, džaz-madern i kłasiku. Pieršy zaniatak zapłanavany na 20 sakavika.
— Dapamahaje mnie asacyjacyja palitźniavolenych, u pryvatnaści, Ina Šyrokaja, a taksama Jaŭhienija Doŭhaja, zasnavalnica prajekta «Palitviazynka».
Pakul Mija płanuje vykładać tancy samastojna, ale spadziajecca paźniej nabrać piedahohaŭ i zajmacca ŭžo arhanizacyjnymi pytańniami.
— Taksama chaču źniać film. U mianie jość adzin prajekt, jaki ja rychtavała jašče ŭ Biełarusi. Zaviecca jon «Staronnija» — u asnovie mistyka i słavianskaja mifałohija. Budu zajmacca lubimaj spravaj.
Čytajcie taksama:
