Rašeńnie ab pierajmienavańni śvisłackaj himnazii było pryniataje 1 śniežnia. Aficyjnych paviedamleńniaŭ ab tym, što navučalnaja ŭstanova źmianiła svajo imia, nie było. Pra toje paviedamili «Našaj Nivie» čytačy.
Pa ich słovach, kiraŭnictva himnazii tłumačyć pieranazvańnie tym, što
«pavodle dakumientaŭ ab prysvajeńni imieni ŭstanovie adukacyi pryjarytet addajecca hierojam Vialikaj Ajčynnaj vajny, a svajaki zhodnyja, kab navučalnaja ŭstanova nasiła ich proźvišča».
«Svajaki našaj ziamlački Pašy Vasilenki pahadzilisia i dali materyjały pra jaje. Tamu i prajšła pracedura pierajmienavańnia», — pracytavaŭ supracoŭnicu administracyi naš čytač.
Imia Kastusia Kalinoŭskaha śvisłackaj škole № 1 było prysvojena ŭ 1987 hodzie pastanovaju Ministerstva aśviety BSSR. U 2005 hodzie škołu rearhanizavali ŭ himnaziju, pakinuŭšy joj imia hieroja biełaruskaj historyi.
Kastuś Kalinoŭski ŭ letapisie navučalnaj ustanovy paznačany jak słavuty vypusknik. Skončyŭ jaje ŭ 1855 hodzie. Pra jaho napisana, što jon naradziŭsia ŭ vioscy Mastaŭlany Hrodzienskaha pavieta (ciapier Biełastockaje vajavodstva Polščy) i byŭ kiraŭnikom paŭstańnia 1863-1864 hadoŭ u Biełarusi, Polščy i Litvie. Zhadvajecca, što Kalinoŭski — paet i publicyst.
U adździele adukacyi Śvisłackaha rajvykankamu na pytańnie ab pryčynach pieranazvańnia himnazii adkazali, što
«asoba Kalinoŭskaha na siońniašni dzień nie źjaŭlajecca takoj papularnaj, tamu i pryniali takoje rašeńnie».
Pavodle čynoŭnikaŭ, mierkavańnie ab niepapularnaści Kastusia Kalinoŭskaha padtrymanaje na ŭzroŭni vobłaści i respubliki.
Praskoŭja Vasilenka — padpolščyca, zakatavanaja hitleraŭcami ŭ 21 hod. Paśla dałučeńnia Zachodniaj Biełarusi da SSSR dziaŭčyna ŭstupiła ŭ kamsamoł, u kałhasie rabiła traktarystkaj. Padčas vajny dapamahała partyzanam.
Śvisłackaja himnazija — adna z najstarejšych ustanovaŭ adukacyi Hrodzienščyny. Jaje adkryli 18 vieraśnia 1804 hoda.
Pavodle Motolko.help, u himnazii byŭ školny muziej z ekspazicyjaj, pryśviečanaj žyćciu Kalinoŭskaha i paŭstańniu 1863 hoda, tam ža byŭ i jaho biust, ale ciapier ničoha hetaha niama.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
U Śvisłačy Kalinoŭskaha viedajuć lepiej, čym Lenina
«Kalinoŭski — vielmi važnaja postać, ale paŭstańnie 1863-ha było katastrofaj» — Łatyšonak
