У цэнтры Мінска прапануецца вельмі дзіўная кватэра. Там адзін унітаз проста на кухні, другі — у шафе
І наогул там усё вельмі дзіўнае.
27.01.2024 / 09:26
На дошцы аб'яў аб здачы нерухомасці ў Мінску ёсць унікальная прапанова. Здаецца аднапакаёвая кватэра з дзвюма прыбіральнямі. Прычым адзін унітаз знаходзіцца проста на кухні, побач з плітой, а другі — у шафе, піша Blizko.by.
Кватэра размешчана недалёка ад плошчы Перамогі па адрасе вуліца Платонава, 3. Такі адрас указаны тэкстам, і гэты ж дом пазначаны на карце. Аднак дакладна вядома, што гэта не жылы дом, а будынак гаспадарчага альбо вытворчага прызначэння.
Таксама пазначана, што гэта цагляны 5-павярховы дом, але ў тым раёне такіх няма зусім. Бліжэйшая жылая цагляная пяціпавярхоўка на Платонава — гэта дамы 31 і 33 бліжэй да вуліцы Гікала. Так што адрас у аб'яве няправільны.
Аднапакаёўка на трэцім паверсе агульнай плошчай 33,6 квадратнага метра мае жылую плошчу 18,9 кв. м. і кухню плошчай 6 кв. м.
Зрэшты, тут пытанне, што лічыць кухняй: тое памяшканне, дзе стаіць пліта, а побач з ёй — умантаваны ў падлогу ўнітаз, або тое памяшканне, дзе ракавіна і грыль-печ, а побач — шафа, праз якую адкрываецца доступ да яшчэ адной прыбіральні.
Мяркуючы па здымках, абедзве прыбіральні аснашчаны даволі свежай сантэхнікай з сучаснымі падводкамі і, мабыць, абедзве ж выкарыстоўваюцца. Санвузел, як сказана ў аб'яве, паасобку.
У кватэры вельмі шмат дываноў, і нават балкон абабіты дыванамі, у тым ліку куфар для захоўвання бульбы
Хоць кватэра знаходзіцца на 3-м паверсе, з боку пакоя на вокнах стаяць краты.
Адзначаецца, што ў кватэры выкананы касметычны рамонт і ёсць Wi-Fi.
Кватэру ахвотна здадуць студэнтам, сямейным парам, рабочым, жыхарам з жывёламі за 681 рубель у месяц (або прыкладна 215 даляраў).
Чытайце таксама:
У Мінску ў элітным доме прадаецца кватэра на даху. Як у Карлсана, толькі ў разы большая
Без вады, з печкай і туалетам на вуліцы. Паглядзіце, як жывуць у старых кватэрах Маладзечна