Лукашэнка падпісаў распараджэнне аб павышэнні эфектыўнасці сістэмы аховы здароўя
Па выніках нарады, якая адбылася 23 мая 2023 года, на якой Аляксандр Лукашэнка зрабіў разнос айчыннай медыцыне, ён падпісаў распараджэнне «Аб павышэнні эфектыўнасці работы сістэмы аховы здароўя», паведамляе БЕЛТА.
02.06.2023 / 15:52
Дзяржаўнае агенцтва пакуль дае расплывістыя фармулёўкі перамен, якія чакаюць медыкаў і пацыентаў.
Так, на старшынь мясцовых органаў улады будзе ўскладзена персанальная адказнасць за санітарна-тэхнічны стан будынкаў і збудаванняў устаноў аховы здароўя.
Міністэрству аховы здароўя дадзены даручэнні аб пераглядзе нарматыўных прававых актаў, якія рэгулююць медыцынскую і фармацэўтычную дзейнасць, аказанне платных медыцынскіх паслуг, з улікам правапрымяняльнай практыкі.
Што гэта значыць, не тлумачыцца, але паведамляецца, што, «ў прыватнасці, неабходна скарэкціраваць парадак дыспансерызацыі насельніцтва, скараціць тэрміны чакання высокатэхналагічных аператыўных умяшанняў і дыягнастычных даследаванняў».
Даручана таксама прыняць дадатковыя меры па рашэнні праблемы недахопу медыкаў, найбольш востры дэфіцыт якіх назіраецца ў сельскай мясцовасці, павышэнні якасці іх падрыхтоўкі і замацаванні на працоўных месцах. Якія гэта дадатковыя меры, невядома.
Але вядома, што «будзе перагледжаны парадак налічэння заработнай платы медработнікам з павелічэннем долі службовага акладу».
Даны даручэнні па забеспячэнні распрацоўкі новых запатрабаваных медыкаментаў, павелічэнні аб'ёмаў вытворчасці і пашырэнні наменклатуры айчынных лекавых прэпаратаў, а таксама ўдасканаленні сістэмы кіравання фармацэўтычнай галіной.
Міжведамасная рабочая група да канца года прадоўжыць праверку сістэмы аховы здароўя, у тым ліку маніторынг вырашэння выяўленых праблемных пытанняў.
Даклады аб выніках праведзенай работы будуць прадстаўлены Лукашэнку ў студзені 2024 года.
Чытайце таксама:
«Я не збіраўся капаць акопы». Медык з райцэнтра расказвае, чаму больш не вытрымаў
У Шклове звольнілі кіраўніка раённай бальніцы. Ëн заклікаў раўняцца на Лукашэнку