Спынілі крымінальны пераслед у дачыненні да трох прадстаўнікоў «Рабочага руху»
Праваабаронцам стала вядома, што трох фігурантаў справы «Рабочага руху», Дзмітрыя Елісеева і Святлану Зыль са Жлобіна, а таксама Маргарыту, прозвішча якой пакуль невядомае, азнаёмілі з пастановай аб спыненні крымінальнай справы па арт. 356 Крымінальнага кодэкса (здрада дзяржаве).
07.06.2022 / 18:30
Дзмітрый Елісееў і Святлана Зыль
Святлану Зыль і Дзмітрыя Елісеева затрымалі 22 верасня 2021 года пасля чарговага допыту і змясцілі ў гомельскі СІЗА.
Затым 12 лістапада Святлану адпусцілі на волю, змяніўшы меру стрымання на залог, а 20 студзеня 2022 года пад залог быў адпушчаны Елісееў.
На мінулым тыдні Елісеева выклікалі ў СК, ён напісаў заяву аб спыненні крымінальнай справы супраць яго ўзамен на штраф у памеры 30 базавых велічынь (960 рублёў). Па якой справе быў аштрафаваны мужчына, пакуль незразумела. Таксама яму абяцалі вярнуць «залогавыя» грошы. Аналагічная сітуацыя і ў Зыль.